CONVIVENCIA

Todas as persoas están obrigadas a tratar aos animais conforme a súa condición de seres sentintes.

En particular, os seus titores ou responsábeis deberán observar as seguintes obrigas respecto dos animais incluídos no ámbito de aplicación desta lei:

• Mantelos nunhas condicións de vida dignas, que garantan o seu benestar, dereitos e desenvolvemento saudábel. En caso dos animais que, polas súas características e especie, vivan de forma permanente en gaiolas, acuarios, terrarios e similares, deberán contar con espazos adecuados en tamaño, naturalización e enriquecemento ambiental para a súa tenencia. As condicións para cada especie desenvolveranse regulamentariamente.
• Educar e manexar ao animal con métodos que non provoquen o sufrimento ou maltrato ao animal, nin lle causen estados de ansiedade ou medo.
• Exercer sobre os animais a adecuada vixilancia e evitar a súa fuxida.
• Non deixalos sós dentro de vehículos fechados, expostos a condicións térmicas ou de calquera outra índole que poidan poñer a súa vida en perigo.
• Prestar ao animal os coidados sanitarios precisos para garantir a súa saúde e, en todo caso, os estipulados como obrigados segundo a súa normativa específica, así como facilitarlles un recoñecemento veterinario coa periodicidade que se determine regulamentariamente, que deberá quedar debidamente documentado, no seu caso, no rexistro de identificación correspondente.
• Manter permanentemente localizado e identificado ao animal conforme á normativa vixente.
• Comunicar á autoridade competente a perda ou subtracción do animal no prazo máximo de corenta e oito horas desde que se produciu a mesma.
• Recorrer aos servizos dun profesional veterinario, ou veterinario acreditado en comportamento animal, sempre que a situación do animal o requira.
• Colaborar coas autoridades, facilitando a identificación dos animais cando así sexa requirido e comunicando o seu cambio de titularidade, extravío ou morte.
• En xeral, cumprir coas obrigas que se estabelecen nesta e outras normas.

A persoa responsábel dun animal será tamén responsábel dos posíbeis danos, prexuízos ou molestias que, sen mediar provocación ou neglixencia dun terceiro, puidera ocasionar a persoas, outros animais ou cousas, ás vías e espazos públicos e ao medio natural, en conformidade coa lexislación aplicábel.

Os titulares ou persoas que convivan con animais de compañía teñen o deber de protexelos, así como a obriga de cumprir o previsto na presente lei e na normativa que a desenvolva, e en particular:

• Mantelos integrados no núcleo familiar, sempre que sexa posíbel pola súa especie, en bo estado de saúde e hixiene.
• Os animais que, por razóns incompatíbeis coa súa calidade de vida, tamaño ou características da súa especie, non poidan convivir no núcleo familiar, deberán dispoñer dun aloxamento adecuado, con habitáculos acordes as súas dimensións e que os protexan das inclemencias do tempo, en boas condicións hixiénico-sanitarias de forma que se facilite un ambiente no que podan desenvolver as características propias da súa especie e raza; en caso de animais gregarios procuraráselles a compañía que precisen.
• Adoptar as medidas precisas para evitar que a súa tenencia ou circulación ocasione molestias, perigos, ameazas ou danos ás persoas, outros animais ou ás cousas.
• Adoptar as medidas necesarias para evitar a reprodución incontrolada dos animais de compañía. A cría só poderá ser levada a cabo por persoas responsábeis da actividade de cría de animais de compañía inscritas como tales no correspondente Rexistro.
• Evitar que os animais depositen os seus excrementos e urinas en lugares de paso habitual doutras persoas, como fachadas, portas ou entradas a establecementos, procedendo en todo caso á retirada ou limpeza de aqueles con produtos biodegradábeis.
• Facilitarlles os controis e tratamentos veterinarios estabelecidos como obrigados polas administracións públicas.
• En caso dos animais de compañía que, polas súas características de especie, vivan de forma permanente en gaiolas, acuarios, terrarios e similares, deberán contar con espazos adecuados en tamaño, naturalización e enriquecemento ambiental para a súa tenencia. As condicións para cada especie desenvolveranse regulamentariamente.
• Superar a formación en tenencia responsábel regulamentada para cada especie de animal de compañía.
• Identificar mediante microchip e proceder á esterilización cirúrxica de todos os gatos antes dos seis meses de idade salvo aqueles inscritos no rexistro de identificación como reprodutores e a nome dun criador rexistrado no Rexistro de Criadores de Animais de Compañía.
• Comunicar á administración competente e ao seu titular a retirada do cadáver dun animal de compañía identificado.

A baixa dun animal de compañía por morte deberá ir acompañada do documento que acredite que foi incinerado ou enterrado por unha empresa recoñecida oficialmente para a realización de ditas actividades, facendo constar o número de identificación do animal finado e o nome e apelidos do seu responsábel ou, no seu defecto, que quede constancia nas bases de datos da empresa que se ocupou do cadáver. En caso de imposibilidade de recuperar o cadáver, deberase documentar adecuadamente.